គីមឈី

គីមឈី ជាអាហារដ៏ពេញនិយមមួយរបស់ប្រជាជនកូរ៉េ និងមានភាពល្បីល្បាញយ៉ាងខ្លាំង៕ ដោយឡែកគ្រឿងផ្សំរបស់គីមឈីនៅក្នុងប្រទេសកម្ពុជា មិនគ្រប់គ្រាន់ដែលជាផលវិបាកក្នុងការធ្វើអាហារប្រភេទនេះ ដោយឃើញដូចនេះហើយ ម្ហូបខ្មែរបាននាំយកវិធីសាស្រ្តធ្វើគីមឈីឲ្យមានរសជាតិឆ្ងុយឆ្ងាញ់ តាមការប្រើប្រាស់គ្រឿងផ្សំដែលមានស្រាប់ក្នុងប្រទេសកម្ពុជា ជាមួយរបៀបធ្វើងាយស្រួល ជូនដល់មិត្តអ្នកតាមដាន៕

+គ្រឿងផ្សំៈ

• ស្ពៃបូកគោ ៥គីឡូក្រាមទឹក២,៥លីត្រ
• អំបិលគ្រួស ៥០០ក្រាម
• ឆៃថាវ ០,៥គីឡូក្រាម
• ការ៉ុត ០,៥គីឡូក្រាម
• ម្យៅអង្ករដំណើប ៖ ២០០ក្រាម (ម្សៅអង្ករដំណើប១ស្លាបព្រាបាយ ហើយនិងទឹក៣០០មីលីលីត្រ)
• ម្សៅម្ទេស(ម្ទេសក្រៀមកិន) ២០០ ក្រាម
• ខ្ទឹមស ១០០ក្រាម
• ខ្ញី ១០០ក្រាម
• ស្លឹកខ្ទឹម ១០-១៥ដើម
• ទឹកត្រី ២០០មីលីលីត្រ

+វិធីធ្វើៈ
*រៀបចំស្ពៃ
យកស្ពៃបូកគោពុសជា២និងពុសត្រង់គល់ប្រវែង២ថ្នាំងដៃ ប្រលាក់ជាមួយអំបិលទុករហូតដល់ស្ពៃបូកគោទ្រោម ស្រពាប់ រួចយកទៅត្រាមទឹក១០នាទី និងលាងជំរះចេញ ដើម្បីកុំឲ្យមានជាតិប្រៃពេក៕
*ទឹកគីមឈី

1. យកម្យៅអង្ករដំណើប ស្ករស កូរលាយជាមួយទឹក រួមយកទៅដាក់ដាំដោយកូរឲ្យស្មើរដៃរហូតដល់  ម្យៅអង្ករដំណើបឆ្អិននិងខាប់
2. ហាន់ ឬឈូស ការ៉ុតនិងឆៃថាវ ជាសសៃតូច
3. ហាន់ស្លឹកខ្ទឹមបញ្ឃិតវែងៗ
4. ហាន់ខ្ញីជាដុំតូចៗ ដើម្បីឲ្យងាយស្រួលក្នុងការកិន រួចយកខ្ញី ខ្ទឹមស និងទឹកត្រីដាក់កិនជាមួយគ្នារហូតដល់ម៉ត់
5. លាយការ៉ុតនិងឆៃថាវ ស្លឹកខ្ទឹម និងល្បាយដែលបានកិនរួច (មិត្តអ្នកតាមដានត្រូវភ្លក់មើលតាមការពេញចិត្ត ព្រោះទឹកគឹមឈីជាចំណុចសំខាន់ដើម្បីឲ្យគីមឈីមានរសជាតិឆ្ងុយឆ្ងាញ់)

*ប្រលាក់ស្ពៃ និងទឹកគឹមឈីឲ្យសព្វជាការស្រេច ដើម្បីឲ្យមានក្លិនឆ្ងុយ និងរសជាតិឆ្ងាញ់ ត្រូវទុកគីមឈីនៅខាងក្រៅជាមួយសីតុណ្ណភាពធម្មតា រយៈពេល២ថ្ងៃ មិត្តអ្នកតាមដានអាចធ្វើការបរិភោគភ្លាមក៏បាន។
តាមរយះការបង្ហាញខាងលើសង្ឃឹមថាមិត្តអ្នកអាននឹងទទួលបានជោគជ័យក្នុងការធ្វើមុខម្ហូបនេះ ៕